...Дејството на претставата ("Кукавицата") се случува околу проблемите, фантазијата, снаодливоста, допадливоста на девојчето Ена кое секој ден доцни на училиште. Но, не и по своја вина: иако нејзиниот татко редовно ги навива будилниците, таа доцни. Заедно со татко и, секојдневно измислуваат нови приказни кои таа понатаму ги раскажува во училиште - како оправдување за тоа што не дошла навреме.

Во таквата атмосфера актерите и децата меѓу себе функционираат на ниво на кое се брише границата меѓу нив. Режијата на Георги Михалков го следи текстот на Емил Рахнев, во кој драмската приказна има многу вистина и логичен тек. Михалков се концентрира на работата/поставувањето на дејството во кое речиси на исто рамниште функционираат и децата и актерите. Практично, заедничката работа ги вовлекува сите учесници во претставата како во игра "без граници#. Секој секому се доближува, секој со секого соработува. Ако од една страна се професионалните актери - Владимир Ендровски, Снежана Стамеска, Камка Тоциноски, Емил Рубен и Петрит Незири, кои одлично ја поддржуваат играта на децата, меѓу нив е малата Магдалена Ендровска која со својот талент и одговорност пред големата актерска задача, на целата претставата и дава тон: таа да говори за вистинските состојби во животот на возрасните и на децата. Тој спој на разбирање и на соработка, на љубов и на желба, е вткаен на начин кој облагородува и радува...